Көктемгі егіс жұмыстары басталғалы бері Қазақстанның оңтүстік өңірлерінде дихандар 311,4 мың гектар жерге егіс екті, оның басым бөлігі дәнді және жемшөп дақылдары, деп хабарлайды inbusiness.kz ҚР Ауыл шаруашылығы министрлігінің баспасөз қызметіне сілтеме жасап.
Биыл дәнді, жемшөп, көкөніс және бақша дақылдарының егіс алқаптары ұлғаяды.
Ауыл шаруашылығы құрылымдарында 160 мың трактор, 5 мыңнан астам жоғары өнімді егіс кешендері, 78 мың сепкіш және 226 мың топырақ өңдеу құралдары бар.
Көктемгі егіс науқанын өткізуге өңірлерге 413 мың тонна жеңілдікті дизель отыны бөлінген. Бұл былтырғыдан 13 мың тоннаға артық. Еліміз бойынша ауыл шаруашылығы тауарын өндірушілер үшін дизель отынының орташа құны 204 теңге/литрге белгіленді. Бұл нарықтық бағадан 15-20% арзан. Бүгінгі таңда өңірлерге шамамен 163 мың тонна отын жөнелтілді.
Биылдан бастап егіске бөлінетін дизель отынын мақсатсыз пайдаланудың жолын кесу үшін операторларға МӨЗ-ден отын жөнелтудің электрондық шот-фактураларының ақпараттық жүйесінде жеке виртуалды қойма құрылып, сондай-ақ отынға арнайы бояу қосылмақшы.
Биылғы жылға 700 мың тоннадан астам тыңайтқыш енгізу жоспарланса, оның 63% отандық аммиак селитрасы мен аммофос құрайды. Жергілікті бюджеттерде тыңайтқыштарды сатып алуды субсидиялау бағдарламасына 31,3 млрд теңге қарастырылған.
"Кең дала" бағдарламасы бойынша көктемгі науқанды қаржыландыруға 140 млрд теңге қарастырылған, оған 3200-ден астам шаруаны қамтып, 2 млн гектарға жуық алқапта егіс және егін жинауды қамтамасыз ету жоспарланып отыр. Қазіргі уақытта 149,7 млрд теңгеге 4133 өтінім келіп түсті.
Сондай-ақ, жалпы сомасы 20 млрд теңгеге жуық форвардтық сатып алу бағдарламасы жалғастырылатын болады. Бұдан бөлек, Азық-түлік корпорациясы ірі ауыл шаруашылығы тауар өндірушілеріне 300 мың тонна астық көлемінде шамамен 35 млрд теңге сомаға егісті сату және кейіннен қаржыландыру үшін тауарлық несие беруді жоспарлап отыр.
