Орал кафесіндегі өрт салдарынан 5 адам зардап шекті, деп жазады inbusiness.kz.
БҚО Төтенше жағдайлар департаментінің мәліметінше, 21 қазан күні сағат 22.00-де "Арбат" кафесінен өрт шықты. Ас үй бөлмесінде 20 шаршы метр аумақта ас үй техникасы мен бензин генераторы жанып кеткен.
"5 адам зардап шекті, олар ауруханаға жеткізілді. Өрт сағат 22.40-та оқшауланып, сағат 22.46-да жойылды", - делінген хабарламада.
"Мой город" порталының жазуынша, облыстық балалар көпсалалы ауруханасына 17 жастағы үш жасөспірім жеткізілген. Дәрігерлердің тексеруінен соң олар амбулаториялық емге жіберілді.
25 және 46 жастағы екі ер адам қалалық көпсалалы аурухананың реанимация бөлімшесінде жатыр. Олардың жағдайы ауыр деп бағаланып отыр.
Өртті сөндіруге барлығы жеке құрамнан 49 адам мен 15 техника жұмылдырылды.
