Орал қаласындағы Желаево өнеркәсіптік аймағында орналасқан ағаш өңдеу цехының бір қабатты ғимаратының шатырынан өрт шықты. Оқиға орнына Төтенше жағдайлар министрлігінің күштері мен құралдары жедел жіберілді, деп хабарлайды inbusiness.kz сайты.
Өртті сөндіру кезінде құтқарушылар ғимарат ішінен үш оттегі және бір газ баллонын қауіпсіз жерге алып шықты. Бұл ықтимал жарылыстың және өрттің одан әрі өршуінің алдын алуға мүмкіндік берді. Сондай-ақ қауіпті аймақтан бір жеңіл автокөлік эвакуацияланды.
ТЖМ мәліметінше, өрт сөндірушілердің жедел әрі үйлесімді әрекетінің арқасында жалынның басқа аумаққа таралуына жол берілмеді. Өрт толықтай сөндірілді.
Оқиға салдарынан зардап шеккендер жоқ.
Төтенше жағдайлар министрлігі тұрғындарды өрт қауіпсіздігі ережелерін қатаң сақтауға шақырып, төтенше жағдай туындаған жағдайда 112 нөміріне дереу хабарласу қажеттігін еске салды.
