Шығыс Қазақстан облысы Ұлан ауданында белгісіз біреулер ағаштар заңсыз кескен. Жергілікті тұрғындар оталған орманды видеоға түсіріп, құзырлы органдардан көмек сұрауда.
Дәлірек айтқанда оқиға Ұлан ауданы Тарғын ауылдық округіне қарасты Тарғын өзенінің бойында болған. Белгісіз адамдар қураған ағаштармен қатар, жас ағаштарды да кесіп, орманға зор зиян келтірген.
- Орманымыз оталып жатыр. Тоқтау салар біреу бар ма? Қурамаған ағаштарды түгел қиып тастапты. Ешкімнің жаны ашып жатқан жоқ, - дейді видео авторы.
Мәселе әлеуметтік желіге жарияланған соң Аумақтық орман шаруашылығы және жануарлар дүниесі инспекциясының қызметкерлері заңсыз ағаш кесу фактісін тіркеген.
- Кесілген ағаштардың саны 21-ге жетті. Ағаштарды қайта санау жүргізілгеннен кейін заңсыз кесілген ағаштың жалпы көлемі - 25,23 текше метрді құрап, табиғатқа келтірілген залал 87 мың теңгені құрағаны анықталды, - деп хабарлады мемлекеттік инспекторлар.
Аталған мәселемен қазір Ұлан ауданының полиция бөлімі айналысып жатыр.
