Төтенше жағдайлар министрі Шыңғыс Әрінов биік ғимараттардағы өртті сөндіруге арналған дронның бағасына қатысты пікір білдірді, деп хабарлайды inbusiness.kz сайты.
Тілшілер Астанада биік ғимараттардағы өртті сөндіруге арналған дронның бағасын сұрады.
"Бұл – пилоттық жоба. Өзіміздің қазақстандық фирма Қытайдың дронын өндіреді. Бір дронның бағасы – 120 млн теңгенің маңайында. Оның ерекшелігіне келсек, дрон 150 метрге дейінгі биікке көтеріліп, өртті сөндіре алады. Оны кез келген өрт сөндіру көлігіне жалғап, қанша уақыт қажет болса – сонша өрт сөндіру жұмысын атқара алады. Бұл біз үшін алғашқы тәжірибе. Әрі қарай оны жетілдіріп, Алматыдағы және биік ғимараттары бар қалаларға оларды енгізетін боламыз. Бұл әлемдік тәжірибе деп айтсақ болады", – деді Шыңғыс Әрінов.
Ведомство басшысының айтуынша, дронды отандық өрт сөндірушілер басқаратын болады.
"Фирма келісімшарт бойынша біздің қызметкерлерді үйрететін болады", – деп толықтырды министр.
Айта кету керек, осыған дейін биік ғимараттардағы өртті сөндіруге арналған 2 дрон сатып алынатынын жазған болатынбыз.
