Тиісті келісімге 2023 жылғы 14-15 қыркүйекте Душанбеде өтетін Орталық Азия мемлекеттері басшыларының V консультативтік кездесуінде қол қойылады, деп хабарлайды Inbusiness.kz.
Тәжікстан Көлік министрлігінің баспасөз қызметі хабарлағандай, бастама өңір елдерінің Көлік және логистика саласындағы берік қарым-қатынастарына қол жеткізуге бағытталған. Келісім жобасы мыналарды көздейді:
- жер үсті көлігімен халықаралық тасымалдарды дамыту үшін қолайлы жағдайлар жасау;
- Орталық Азиядағы көлік қызметтері нарығында бәсекелестік ортаны қамтамасыз ету;
- тиімділікті арттыру және жаңа халықаралық дәліздерді, оның ішінде мультимодальды жолдарды қалыптастыру;
- жер үсті көлігімен тасымалдау және транзит процесін жеңілдету;
- заманауи көліктік-логистикалық қызметтерді дамыту;
- инновациялық технологияларды енгізу және пайдалану, оның ішінде жерүсті көлігімен тасымалдау процесін цифрландыру;
- көліктің экологиялық таза түрлерін пайдалану практикасын дамыту.
Алдағы іс-шара аясында алғаш рет өңірдің бес елінің көлік министрлерінің саммиті өтеді, онда ведомство басшылары көліктік-логистикалық қатынастарды және оларды одан әрі үйлестіруді талқылайды.
Кездесу қорытындысы бойынша министрлер бірлескен коммюникені қабылдайды.
"Душанбеде өңір елдерінің көлік министрлері де екіжақты кездесулер өткізеді. Олар үшін мәдени бағдарлама да ұйымдастырылады", - деп хабарлады Тәжікстан Көлік министрлігі.
