Талдықорған қаласы полиция басқармасы патрульдік полициясының қызмет инспекторлары Данияр Базарбаев пен Диас Омаров батыл әрекеттері үшін ІІ дәрежелі “Айбын” орденімен марапатталды, деп жазады inbusiness.kz сайты.
Дүкен өртеніп жатты. Әріптесім екеуміз патрульдеу барысында байқап, оқиға орнына келсек, ешкім жоқ екен. Алдымен эвакуация жасауға кірістік, – деді Данияр Базарбаев.
Бірінші қабаттағы жалынды көрген тәртіп сақшылары ғимараттың екінші қабатына шыққан.
Ұйқыда жатқан азаматтарды оятып, үй ішінен бір үлкен кісі мен жас қызды алып шықтық. Тінту барысында үйде екі газ баллон бар екенін байқадық. Оны да тез арада алып шықтық, – деді Диас Омаров.
Қайғылы жағдайдың алдын алған полицейлер өрт сөндірушілерді шақырған.
Қорқыныш болды. Қорқыныш болғанымен, адамдарды құтқару бірінші мақсатымыз болды. Ішкі істер органдарында тоғыз жылдан бері қызмет атқарып келемін, – деді Данияр Базарбаев.
Оның әріптесі Диастың полицияда қызмет еткеніне сегіз жыл болған.
Полицей болу – менің бала күндегі арманым. Өзімнің әкем де осы салада қызмет атқарып, зейнетке шыққан. Кішкентай кезімнен әкеме қарап қызығатынмын. Сол арманыммен осы жұмысқа келдім, – деді Диас Омаров.\
