Референдум болмайды. Орталық сайлау комиссиясы бастамашыл топтың жалпы халық талқылау өткізу ұсынысын қабылдамай тастады. Бұл туралы ортсайкомның ресми сайтында хабарланды. Онда өтініштің қабылданбауына бірнеше себеп дәйек ретінде көрсетіліпті. Соның бірі - референдум өткізу алдындағы жиынға қатысушылар санының анық болмауы. "Республикалық референдум туралы" Заңның 12-бабына сәйкес, халықтық талқылауға әрбір өңірден ең кемі 30 адамнан жиналып, 510 адам қатысуға тиіс. Бірақ Орталық комиссияға әкелінген құжатта 585 адам қатысады деп көрсетілгенімен, олардың аты-жөндері ашық тіркелмеген.
Еске салсақ, 20 қарашада Қазақстанда сайлау туралы заңды өзгерту жөнінде референдум өткізуді ұсынып, 62 адамнан тұратын бастамашыл топ өтініш жасаған. Белсенділер жалпы халықтық талқылауға 2 сұрақты шығармақ болыпты. Біріншісі - пропорциялық жүйемен тең мөлшерде бір мандатты округтер бойынша сайлау жүйесін енгізу, екіншісі - партия мүшелері санын 40 мыңнан 1 мың адамға дейін азайту.
