Шығыс Қазақстанда соңғы бір аптада күн райы күрт жылып, тұрғындардың мазасын кетіре бастады. Қапырық ыстықтың салдарынан Өскемен қаласында күніне 1-2 бала жедел жәрдем қызметкерлерінің көмегіне жүгінуде.
ШҚО денсаулық сақтау басқармасының мәліметіне сүйенсек, осы аптаның басынан бері Өскеменде бірнеше бала ыстықтан зардап шеккен. Ал ересектер арасынан дәрігер көмегіне ешкім жүгінбеді.
- Қазір қала бойынша күн сайын ыстық өткен 1-2 баланың ата-анасы жедел жәрдем шақыруда. Ал аудандардағы жағдай тұрақты. Ыстық ауа райында бас киімсіз көшеге шықпаңыз. Мүмкіндігінше, сағат 12:00-ден 17:00-ге дейін күн астында жүру уақытын шектеңіз. Көшеге шығарда ашық түсті киімдерді таңдаңыз. Жиі су ішіп жүріңіз, - дейді облыстықжедел жәрдем станциясы бас дәрігерінің орынбасары Гүлнәр Кекіманова. Айта кетейік, өңірде сынап бағанасы 41 градусқа дейін көтерілді.
