Қоғамдық көліктердің зейнеткерлер мен балаларға жасалатын жеңілдіктен бас тартуы заңға қайшы. Бұл туралы Өскемен қалалық әкімдігі мәлімдеді, деп хабарлайды altaynews.kz.
"№ 25, 25А, 43, 43А автобустары тиесілі мекеме енді жеңілдік жасамаймыз деп отыр. Яғни 15-ке толмаған бала да, 70-тен асқан қария 90 теңге төлеуі керек.
Автопарктің мұндай шешімге келуіне көптеген себеп түрткі болған екен, сондағы ең басты себеп – әкімдік тарапынан субсидияның берілмеуі. Тасымалдаушылардың айтуынша, шығындардың бір бөлігін әкімдік өтеуге тиіс, бірақ жылдар бойы осы міндеттеме орындалмай келеді.
Осы мәселеге қатысты Тұрғын үй-коммуналдық шаруашылығы, жолаушылар көлігі және автомобиль жолдары бөлімі "ВЭСТ" автокөлік цехына ескертпе жіберді. Ескертуде көрсетілгендей, ҚР автомобиль көлігі туралы заңына сай, 7-15 жас аралығындағы балаларға жеңілдік міндетті түрде жасалуы керек. Егер 1 шілдеден бастап аталған жеңілдік алынып тасталатын болса, қала әкімдігі келісім бұзылғанын мәлімдейді.
