Өскемен қаласында тұрғын үйдің жертөлесінен өрт шығып, 80 адам эвакуацияланды, деп хабарлайды inbusiness.kz тілшісі ТЖМ баспасөз қызметіне сілтеме жасап.
Төтенше жағдай 6 шілде түнгі сағат 23:08-де болды. Ломоносов көшесіндегі бес қабатты тұрғын үйдің жертөлесінде қоқыс пен ескі заттар жанған.
"Үйді қою түтін басты. Оқиға орнына келген өрт сөндірушілер тұрғындарды дереу эвакуациялай бастады. Баспалдақ марштары бойымен 80 адам, оның ішінде 15 бала эвакуацияланды. Құтқарушылар 1938 жылғы әйелді көтеріп алып шықты", делінген хабарламада.
Өрт сөндірушілер темір кесетін құралдың көмегімен жертөленің есігін ашып, 3 шаршы метр алаңдағы өртті сөндіріп, түтінді сорып шығарған.
Ведомство ақпаратынша, мұндай қатты түтінге сөндірілмеген темекі немесе сіріңке себеп болған. Қаза болғандар мен зардап шеккендер жоқ.
