Қаңтар-маусым аралығында ел тұрғындарына шетелден жіберілген ақша аударымдарының жалпы көлемі 147,5 млрд теңгені құрады. Бұл өткен жылдың сәйкес кезеңімен салыстырғанда 10,5%-ға көп.
Ranking.kz-тің есебіне сүйенсек, ақшаның көбі (71,2 млрд теңге) Ресейден жіберілген. Дегенмен, биылғы қаңтар-маусымда солтүстіктегі көршімізден жолданған қаржы көлемі былтырмен салыстырғанда 7,5%-ға аз. Шетелден жіберілген қаржының жалпы көлеміндегі Ресейдің үлесі де 57,7%-дан 48,3%-ға кеміген.
Бұдан кейінгі орында Оңтүстік Корея републикасы тұр. Бұл елден жолданатын қаржы көлемі бірден 2,3 есе өсіп, 22,9 млрд теңгені құрады. Жалпы көлемдегі Оңтүстік Кореяның үлесі 7,4%-дан 15,5%-ға дейін артты.
Үштікті Қырғызстан түйіндеп тұр. Осы жылдың қаңтар-маусым аралығында бұл елден Қазақстанға 13,3 млрд теңге жолданған. Өсім 77,4%-ға тең болды. Осылайша, айыр қалпақты ағайынның үлесі 5,6%-дан 9,9%-ға дейін ұлғайды.
Қазақстанға жіберілген ақша аударымдарының көбі, яғни 73 млрд теңгесі "Золотая корона" жүйесі арқылы жолданған. Сондай-ақ шетелден ақша жіберетіндер Western Union (35,6 млрд теңге) және MoneyGram (11,7 млрд теңге) жүйелерін де көп пайдаланған.
Фархат Әміренов
