Ел бюджетіне ақылы жолдардан 4 млрд теңге табыс түсті. Бұл туралы Индустрия және инфрақұрылымдық даму министрлігі хабарлады.
Бүгінде Қазақстанда төрт ақылы жол бар. Олар: Нұр-Сұлтан – Щучинск, Нұр-Сұлтан – Теміртау, Алматы – Қорғас, Алматы – Қапшағай. Бұлардың жалпы ұзындығы 682 шақырым.
"2018 жылдың 1 қарашасынан бастап 2019 жылдың 1 қарашасына дейін жалпы жиналған сома 4,3 млрд теңгені құрады. Атап айтсақ, Нұр-Сұлтан – Щучинск 1,4 млрд теңге, Нұр-Сұлтан – Теміртау 1,4 млрд теңге, Алматы – Қапшағай 798,7 млн теңге, Алматы – Қорғас 701,8 млн теңге табыс түсті", – деп хабарлады министрлік.
Сонымен қатар "Батыс Еуропа – Батыс Қытай" дәлізін жеке инвесторлардың көмегімен ақылы ету қарастырылуда. Министрлік аталған жолды жөндеуге 794,7 млрд теңге жұмсалғанын атап өтті. Сондай-ақ 2020 – 2023 жылдары республикалық маңызы бар 11 мың шақырым көлік жолына ақылы жүйені орнату көзделіп отыр.
