Ғылым және жоғары білім министрі Саясат Нұрбек ғалымдарды қолдау бағытында қандай жұмыстар қолға алынғанын айтты, деп хабарлайды inbusiness.kz сайты.
"Еліміздің ғылыми әлеуеті – 25,5 мың ғалым, оның 46%-ы 40 жасқа дейінгі мамандар. Ғылым саласында 425 ұйым жұмыс істейді. Енді гранттық конкурстар жыл сайын өткізіледі. Бұрын 3 жылда бір өкізілетін", – деді ведомство басшысы Үкімет отырысында.
Сонымен қатар, мемлекеттік қолдау тетіктері кеңейтілген. Атап айтқанда, постдокторанттар мен жас ғалымдарға гранттар, әзірлемелерді коммерцияландыруды қаржыландыру, іргелі институттарды тікелей қаржыландыру, шетелдік тағылымдамалар және мега-гранттар енгізілді.
"Қазір 264 ғылыми-техникалық бағдарлама, 2 361 ғылыми жоба (оның 835-і жас ғалымдарға тиесілі) және 208 коммерцияландыру жобасы қаржыландырылуда. 1 475 ғалым шетелде ғылыми тағылымдамадан өтті. Жас ғалымдарға арналған гранттық конкурстар арқылы 2 000-нан астам зерттеуші 835 жобаны жүзеге асыру мүмкіндігін алды. Министрлік қаржыландыратын әрбір жобада жас ғалымдардың үлесі кемінде 30%", – деді Саясат Нұрбек.
