Қазіргі уақытта Отбасының цифрлық картасы мемлекеттік қолдау шараларын алуға құқығы бар қазақстандықтарға қандай да бір өтініштерсіз жәрдемақылар мен әлеуметтік төлемдердің 9 түрін ресімдеуге мүмкіндік береді, бұл туралы Еңбек және халықты әлеуметтік қорғау министрлігінің ақпараттық ресурсына сілтеме жасап, inbusiness.kz хабарлайды.
"Отбасының цифрлық картасы" ақпараттық жүйесін пилоттық режимде енгізудің арқасында осы жылдың 1 қыркүйегінен бастап 36 мың адамға мемлекеттік қызметтер бойынша SMS жолданды. Бұл ретте өтініш берусіз жәрдемақы немесе төлем алу мүмкіндігін 7 мыңнан астам адам пайдаланды" делінген хабарламада.
"Отбасының цифрлық картасы" ақпараттық жүйесі арқылы:
жүктілікке және босануға байланысты табысынан айырылған жағдайда әлеуметтік төлем;
бала күтіміне байланысты табысынан айырылған жағдайда әлеуметтік төлем;
жұмысынан айырылған жағдайда әлеуметтік төлем, асыраушысынан айырылу бойынша әлеуметтік төлем;
мүгедектігі бар баланы тәрбиелеп отырған ата-анасына (қамқоршысына) жәрдемақы;
мүгедектігі бойынша жәрдемақы, көпбалалы отбасыларға берілетін жәрдемақы;
"Алтын алқа" және "Күміс алқа" алқаларымен марапатталған көпбалалы аналарға берілетін жәрдемақы;
атаулы әлеуметтік көмекті рәсімдеуге болады.
"Мемлекеттік қолдау шараларын алуға құқық белгіленген кезде әлеуетті алушыға 1414 бірыңғай байланыс орталығынан SMS-хабарлама жіберіледі. Хабарлама алған азамат оған келісімі туралы жауап беруі керек. Өтінішті ресімдеу және әлеуметтік жәрдемақы немесе төлем тағайындау автоматты режимде жүргізіледі, содан кейін ақша қаражаты алушының банк шотына аударылады", – делінген хабарламада.
Отбасының цифрлық картасы – бұл әртүрлі мемлекеттік органдардың мәліметтерін жинақтайтын, азаматтардың әлеуметтік әл-ауқатының деңгейін анықтауға және оларға проактивті форматта кепілдендірілген мемлекеттік қолдау көрсетуге мүмкіндік беретін ақпараттық жүйе.
