Бір апта ішінде 1847 қылмыс жасалды, оның 1753-і тәулік ішінде ашылды, деп жазады Inbusiness.kz.
"Полиция қызметкерлері ізін суытпай 7 кісі өлтіруді, өлімге әкеп соққан денсаулыққа қасақана зиян келтіру бойынша 4 істі, 38 тонау және 396 бөтен мүлікті ұрлау қылмыстарын ашты", — деп хабарланды ІІМ апталық брифингінде.
Сонымен қатар, ІІМ баспасөз қызметі өткен аптадағы жүргізілген іс-шараларға тоқталды. Павлодар облысы Полиция департаменті Ұйымдасқан қылмысқа қарсы күрес басқармасының қызметкерлері "Ертіс орманы" ерекше қорғалатын аумағынан орманды заңсыз кесу және ұрлау фактілерін анықтау бойынша жедел іздестіру іс-шаралар кешенін өткізді. Мәселен, 18 қыркүйекте облыстық Прокуратураның үйлестіруімен "Ертіс орманы" резерваты бойынша ауқымды операция жүргізілді.
"Полиция қызметкерлері "Ертіс орманының республикалық мемлекеттік мекемесінде" Шалдай және Бесқарағай орманшылығында, сондай-ақ бірқатар басшылардың тұрғылықты жері бойынша 20-ға жуық санкцияланған тінті іс-шараларын жүргізді. Тінту кезінде құжаттамадан басқа атыс қаруы, оқ-дәрілер және өзге де заттай дәйектер тәркіленді. Қазір ҚК 188 бабы, 2 бөлігі бойынша сотқа дейінгі тергеу басталды", — деп хабарланды брифинг барысында.
