ҒЖБМ Ғылым және жоғары білім саласындағы сапаны қамтамасыз ету комитетінің төрағасы Гүлзат Көбенова ОКҚ алаңында өткен брифингте жоғары оқу орындары білім беру бағдарламалары рейтингісінің қорытындысы туралы баяндады, деп жазады inbusiness.kz.
Өткен жылдың қорытындысы бойынша Жоғары оқу орындарының білім беру бағдарламаларының сапасы мен өзектілігі бойынша жұмыс берушілердің қанағаттануы 67% құрады. Жұмыс берушілер тарапынан қанағаттанудың өсуі байқалады.
"Бұл жақсы нәтиже. Білім беру бағдарламаларының 82%-ы жұмыс берушілермен келісілген және практикалық тәжірибесі бар мамандар оқу процесіне тартылды. Ол үшін министрлік қажетті жағдайлар жасап, тиісті нормативтік құжаттарға өзгерістер енгізді. Бүгінгі таңда жекелеген білім беру бағдарламаларына тартылған практик-мамандардың үлесі 71%-ға жетті. Білім беру бағдарламаларының 91%-ы танылған аккредиттеу агенттіктерінде аккредиттеуден өтті, бұл да олардың сапасының жақсарғанын растайды", – деді Көбенова.
Жұмысқа орналастыру мәселесіне тоқталған ол 2022 жылы түлектердің 67%-ы тұрақты жұмыспен қамтылғанын атап өтті. Түлектердің жұмысқа орналасуының орташа пайызы 79% құрады. Ал жұмыс іздеудің орташа ұзақтығы – 97 күн, яғни 3 айға дейін. Сұранысқа ие білім беру бағдарламалары бойынша – тіпті бір ай ішінде жұмысқа орналасады.
"Шетелдік жоғары оқу орындарымен әріптестікке келсек, білім беру бағдарламаларының 3,2%-ы бойынша қос дипломды бағдарламалар, ал 1,6%-ы бойынша шетелдік серіктес жоғары оқу орындарымен бірлескен бағдарламалар ұсынылды. Оның ішінде техникалық, педагогикалық, гуманитарлық және т.б. бағыттар бойынша. Сонымен қатар студенттерді сыртқы академиялық ұтқырлық шеңберінде шетелдік жоғары оқу орындарында оқыту, яғни бір семестр немесе триместр ішінде оқыту мүмкіндіктері кеңейді. Конкурсқа қатысқан түлектердің 44%-ы шетелде оқудан өтті. Ал түлектердің 11%-ы магистратурада оқуын жалғастырды", – деді спикер.
Сонымен қатар білім беруді цифрландыру көрсеткіштері бойынша айтарлықтай жақсартулар байқалады, қашықтан оқытуды қамтамасыз ету бойынша тұтас экожүйе қалыптастырылды. Жоғары оқу орындарының 90%-ы электрондық кітапханалармен, 95% – антиплагиатқа қарсы жүйемен, 98% – прокторинг жүйесімен қамтылған.
