Жамбыл облысындағы жолаушылар пойызы апатына айыптыларға сот үкімі шықты, деп хабарлайды Atameken Business
Адам өліміне әкелген төтенше жағдайға байланысты сот алдында 3 айыпталушы жауап берген еді. Олар – "Қазақстан темір жолы" Шу аралығы директорының орынбасары, екінші өндіріс аймағының басшысы, сондай-ақ оның орынбасары. Олар қауіпсіздік шараларын бұзғаны үшін немесе теміржол көлігін пайдалануда қауіпсіздік шараларын сақтамағаны үшін айыпты деп танылған болатын.
"Қазақстан темір жолы" Шу аралығы директорының орынбасары 3 жылға бас бостандығынан айырылды. Ал қалған 2 айыпты алдағы 2 жыл өмірін темір тордың ар жағында өткізбек. Сондай-ақ, сот оларға қаза тапқан баланың отбасына, зардап шеккендерге материалдық көмекті өтеуді міндеттеді. Оның жалпы соммасы 3 миллион теңгеге жуық.
Сотталғандар шешіммен келіспей, апелляциялық шағым түсіруге ниетті.
Еске салайын, өткен жылы маусым айында Жамбыл облысының Шу ауданында Астана – Алматы бағытындағы №9 "Бәйтерек" пойызының вагондары рельстен шығып кеткен. Алты вагон аударылып қалған болатын. Сол кезде сегіз адам зардап шегіп, 12 жастағы бала қаза тапты. Ол отбасымен бірге Ыстықкөлге демалуға бара жатқан.
