Павлодар облысында өз еркімен қару және оқ-дәрі тапсырған тұрғындарға 4 миллион теңгеден астам ақшалай сыйақы төленген, деп хабарлайды pavlodarnews.kz.
Өңірлік ІІД баспасөз қызметінің хабарлауынша, аталған сома 85 атыс қаруы және иір ойықты қаруға арналған 3 515 оқ-дәрі үшін ұсынылған. Қаруды ерікті түрде тапсыру бойынша полицияға 109 өтініш келіп түскен.
"Өңір тұрғындары 112 тегіс оқпанды және бір қысқа оқпанды иір ойықты қару, 4 279 оқ-дәрі тапсырды. 10 мамыр күні жергілікті тұрғын "ИЖ-18Е" маркалы, 12 мм калибрлі тегіс оқпанды сыңар ауыз аңшы мылтығын өз еркімен әкелді. Ол қаруды биыл мамыр айының басында Алюминстрой шағын ауданында тауып алған", - дейді баспасөз қызметінен.
Бұдан басқа, Успен ауданының тұрғыны атасынан мұраға қалған шетел өндірісінен шыққан, 16 калибрлі тегіс оқпанды қос ауыз аңшы мылтығын алып келген.
Еске сала кетейік, облыста 10 сәуірден бастап заңсыз сақталған атыс қаруы мен жарылғыш заттар, оқ-дәрілерді халықтан сатып алу жүргізілуде.
