ҚР премьер-министрі Асқар Мамин және Өзбекстан премьер-министрі Абдулла Арипов "Бейнеу – Ақжігіт – Өзбекстан шекарасы" бағытындағы халықаралық маңызы бар автокөлік жолының ашылу рәсіміне қатысты, деп хабарлайды primeminister.kz.
ҚР үкіметінің басшысы "Бейнеу – Ақжігіт – Өзбекстан Республикасының шекарасы" халықаралық автомобиль жолында қозғалыстың ашылу рәсімімен құттықтап, бұл айтулы оқиғаның Орталық Азияның көлік инфрақұрылымының дамуына, сауда-саттық көлемінің артуына, транзиттік әлеуетін іске асыруға серпін беретінін атап өтті.
ҚР үкіметінің басшысының айтуынша, соңғы жылдары Қазақстан мен Өзбекстан арасындағы өзара қарым-қатынас сапалық тұрғыдан жаңа деңгейге шықты және оң динамикаға ие болды. Оның дәлелі өзара сауда көлемінің жыл сайынғы өсімі болып табылады. Өткен жылы тауар айналымы $3 млрд құрады. Биылғы жылдың басынан бері оң өсім динамикасы байқалуда.
Өзбекстан премьер-министрі Абдулла Арипов көршілес бауырлас Қазақстан мен Өзбекстан елдері үшін бұл оқиғаның стратегиялық маңыздылығын атап өтті.
