Өзбекстан азаматтары "Тәжен" бақылау-өткізу пунктінде Қазақстанмен арадағы шекарадан кедергісіз өту үшін белгісіз азаматтарға мәжбүрлі түрде ақша төлейтін көрінеді. Олар осы жағдайға шағымданып отыр. Бұл туралы Өзбекстанның Сыртқы істер министрлігіне сілтемемен Интерфакс-Қазақстан хабарлады.
"Белгісіз тұлғалар "Тәжен" бақылау-өткізу пунктінде Өзбекстан азаматтарынан оларды шекарадан өткізу үшін ақша бопсалайды деген шағымдарға байланысты біздің еліміздің Нұр-сұлтан қаласындағы елшілігі мен Ақтау қаласындағы Бас консулдығы қазақстандық тараппен бірлесіп, мән-жайды анықтау және проблемаларды шешу үшін бірқатар дипломатиялық қадамдар жасауда", – делінген Өзбексанның Сыртқы істер министрлігінің ресми мәлімдемесінде.
Көрші елдің ведомствосы Қазақстан аймағында жүрген өзбекстандықтардың осындай жағдайларда Өзбекстанның Нұр-Сұлтандағы елшілігіне, Ақтау мен Алматыдағы консулдықтарға жүгіне алатындарын жеткізді.
Ал еліміздің Сыртқы істер министрлігінің ресми өкілі Айбек Смадияров өзбекстандық әріптестерінен келген хат тергелу үшін тиісті ведомствоға жіберілгенін жариялады.
Табиғат Нұрболат
