Бұл туралы Inbusiness.kz ведомствоның баспасөз қызметіне сілтеме жасап хабарлайды.
Тіркелген жағдайлардың барлығы Самарқанд облысының балалар көпсалалы медициналық орталығында болды, онда осы шәрбатты госпитализацияға дейін қабылдаған балалар түсті.
"Док-1 Макс" таблеткалары мен сиропын Үндістанның Marion Biotech Pvt.Ltd. компаниясы шығарады. Өзбекстанға импорттаушы - Quramax Medikal ЖШС. Аталмыш дәрі-дәрмек Өзбекстанда 2012 жылдан бері сатылып келеді. Фармацевтика саласын дамыту агенттігі куәландырғандай, әрбір дәрілік серия мұқият тексеріліп, кейін сәйкестік сертификаты берілген.
"Алдын ала зертханалық зерттеулер "Док-1 Макс" сиропының берілген сериясында этиленгликоль бар екенін көрсетті. Бұл зат улы, шамамен 1-2 мл/кг 95 пайыздық концентрацияланған ерітінді пациенттің денсаулығында құсу, естен тану, құрысулар, жүрек-қан тамырлары проблемалары мен жедел бүйрек жеткіліксіздігі сияқты елеулі өзгерістер тудыруы мүмкін", — делінген өзбек Денсаулық сақтау министрлігінің хабарламасында.
Алдын ала тергеу барысында барлық қайтыс болған балаларға ата-аналары шәрбатты суық тиюге қарсы дәрі ретінде дербес немесе дәріхана қызметкерлерінің ұсынысы бойынша бергені анықталды. Ауруханаға жатқызылғанға дейін балалар "Док-1 Макс" дәрі-дәрмегін үйде екі-жеті күн бойы күніне үш-төрт рет жоғары дозада қабылдаған.
"Істі тергеу барысында Министрліктің жұмыс тобы анықтаған заңнаманы бұзудың барлық жағдайларын ескере отырып, жеті жауапты қызметкер өз міндеттеріне немқұрайлы қарап, балалар өліміне уақтылы талдау жүргізбегендіктен және қажетті шараларды қолданбағандықтан атқаратын лауазымдарынан босатылды. Сондай-ақ, бірқатар мамандарға қатысты тәртіптік жаза қолданылды", - деп толықтырды ведомстводан.
Сот отырысы барысында анықталғандай, 2022 жылдың қыркүйек-желтоқсан айлары аралығында Самарқанд облысының балалар көпсалалы медициналық орталығына 6 жасқа дейінгі жедел бүйрек жеткіліксіздігімен 21 науқас бала түскен, 15-і-үшке де толмаған балалар. Нәтижесінде үш бала емделіп, үйлеріне жіберілсе, қалған 18-і қайтыс болған.
Науқастардың туыстарының айтуынша, балаларда қарапайым тұмаудың белгілері болған. Олардың жағдайы "Док-1 Макс" препаратын қабылдағаннан кейін нашарлады.
Мамандар препаратты қолдану жөніндегі нұсқаулықта оны екі жастан бастап қолдануға болатындығына назар аударды. Бұл жағдайда ұқсас құрамы бар басқа фирмалардың препараттарын негізінен 12 жастан бастап қолдануға рұқсат етіледі.
Өзбекстанның балалар омбудсменінің баспасөз қызметі денсаулық сақтау министрлігінің ережесіне сәйкес емдеу-профилактикалық мекемелерде қайтыс болған пациенттердің өлімінің нақты себебін анықтау үшін патологиялық зерттеулер жүргізу қажет екенін, алайда қайтыс болған балалардың денелері мұндай зерттеуге ұшырамағанын атап өтті.
Қазіргі уақытта "Док-1 Макс" таблеткалары мен сироптары Өзбекстанда сатылымнан толығымен алынып тасталды. Осы оқиға бойынша жиналған барлық материалдар құқық қорғау органдарына берілді.
