Өзбекстанда мектепке дейінгі және мектептегі білім министрлігі мейрамханаларда, кафелерде және пәтерлерде бітіру кештерін өткізуге тыйым салды, деп хабарлайды Inbusiness.kz.
Ведомствоның баспасөз қызметі 2023-2024 оқу жылының аяқталуы мен жалпы білім беру мекемелерінде "соңғы қоңырау" іс-шараларын өткізу бойынша тиісті ұсыныстарды жариялады.
Мектеппен қоштасу шараларын таңғы 8-ден 9-ға дейін өткізу ұсынылады. Оқушылардың санына байланысты оларға 1, 4, 9 және 11 сынып оқушыларын қатыстыруға, аудандық белсенділерді, ата-аналарды, құқық қорғау органдарының қызметкерлерін шақыруға болады. Іс-шара кезінде өртке қарсы қауіпсіздік ережелерін сақтау қажет.
Сонымен қатар, құрметті мұғалімдерді, бұрынғы түлектерді шақыру, биылғы жылдың ең табысты түлектерін, сондай-ақ мектеп өміріне белсенді қатысатын ата-аналарды марапаттауға рұқсат етіледі.
- Алайда оқу орындарын жаңа оқу жылына дайындау мақсатында оқушылар мен олардың ата-аналарынан ақша жинау;
- оқушылардан қымбат сыйлықтар алу не ақша жинау, соңғы қоңырау кештеріне қымбат киім сатып алу, автокөлікпен сапарлар ұйымдастыру;
- түлектердің даңғылдар мен саябақтарда топтық серуендеуі, бассейндерге баруына тыйым салынады.
