Шымкенттік кәсіпкер Бауыржан Әлібеков Өзбекстанға ұн сатамын деп, алданып қалды. Ірі көлемде астық экспорттаған ол үш жылдан бері 450 мың АҚШ долларын қайтара алмай келеді. Дәл осындай жағдай қарағандылық бизнесменнің де басынан өткен. Көрші елдің саудагерлері осылайша қазақстандық екі кәсіпкерді 900 мың АҚШ долларына алдап кеткен.
27 вагон ұнның орнын сипап қалған шымкенттік кәсіпкер әділдік іздеумен келеді. Айтуынша бастапқы құны 150 мың АҚШ доллары тұратын алғашқы партияны Ташкентке жөнелткен. Оған тез арада ақшасын төлепті. Осылайша, сеніміне кіріп, кейін тақырға отырғызған. Бүгінде миллиондаған ақшасынан айырылған кәсіпкер алаяқтардың үстінен шағым түсіріп, сот санкциясымен оларды уақытша қаматыпты. Алайда сот дәлелдемелер жеткіліксіз деген себеппен көрші елдің азаматын босатып жіберген.
Кәсіпкер екінші рет соттың аппеляциялық алқасына жүгінді. Қазір тергеуді қайта бастау жөнінде шешім шығарылды.
