Израиль әскері келісімге сәйкес кейбір аймақтардан шығарылған соң, адамдар легі солтүстік бағытқа – анклавтың ең ірі қаласы саналатын Газа қаласына қарай бет алды.
Израиль қорғаныс күштері (IDF) тұрғындарды тек рұқсат етілген гуманитарлық бағыттармен жүруге шақырып отыр.
Палестина Денсаулық сақтау министрлігінің мәліметінше, медициналық топтар Израиль әскерінің кеткенінен кейін Газа секторындағы бірнеше аудандардан кемінде 100 адамның денесін алып шыққан. Көптеген аудандарда әлі де үйінділер астында адамдар қалуы мүмкін екені айтылуда.
Газа секторында Израиль мен Палестина күштері арасындағы атысты тоқтату туралы келісім 10 қазан күні күшіне енді.
Құжатқа сәйкес, 72 сағат ішінде тірі және қаза болған израильдік тұтқындар босатылуы тиіс. Өз кезегінде Израиль билігі өмір бойына бас бостандығынан айырылған 250 палестиналық тұтқынды, сондай-ақ соғыс кезінде қамауға алынған қосымша 1700 газалықты босатуға міндеттелген.
Сонымен қатар, келісім Израиль күштерінің атысты тоқтату күшіне енгеннен кейін 24 сағат ішінде Газа секторының бірнеше аймағынан, соның ішінде "Сары сызық" деп аталатын шекаралық белдеуден әскерін шығаруын қарастырады.
Қазіргі уақытта Газа халқы қалалары мен ауылдарына қайта оралып, үйлерін қалпына келтіру әрекеттерін бастап кетті. Алайда гуманитарлық ұйымдар аймақтағы ахуалдың әлі де өте күрделі екенін, азық-түлік пен медициналық көмектің тапшылығы сақталып отырғанын атап өтуде.
