БҰҰ-ның бас хатшысы Пан Ги Мун Оңтүстік Кореяның саясатына қайта оралуы мүмкін екенін айтты. Бұл туралы "Ёнхап" мәлім етті.
"БҰҰ Бас хатшысы ретінде 10 жыл бойы білген-көргенім, аңғарғаным Корея Республикасының дамуына ықпал ететін болса, онда мен өзімді соған арнауға дайынмын", – деді ол.
Пан Ги Мунның айтуынша, мемлекет басшысын сайлауға қатысу туралы түпкілікті шешімді ел халқымен кездесіп, оның пікірін тыңдаған соң қабылдамақ.
9 желтоқсанда Оңтүстік Кореяның парламенті президент Пак Кын Хенің импичментіне дауыс беріп, өкілеттігін тоқтатқан болатын. Елдегі саяси дағдарысқа мемлекет басшысының жақын құрбысы Чхве Сун Сильдің қатысы бар дау себеп болды.
БҰҰ-ның Бас хатшысы өз қызметін өкілеттік мерзімінің өтуіне байланысты 2017 жылғы 1 қаңтарда аяқтайды. Оны Халықаралық ұйымға басшы болып сайланған Антионио Гуттереш алмастырады. Пан Ги Мун 2004 жылғы қаңтар мен 2006 жылғы желтоқсан аралығында Оңтүстік Кореяның сыртқы істер министрі болған еді.
