"Алаяқтығы үшін сотталған пробация қызметінің есебінде тұратын ер адам түнгі уақытта тексеру кезінде үйінде болмаған. Бұл құқық бұзушылық оның жеке ісіне тіркелетін болғандықтан, сотталған азамат пробация инспекторына қызыл балық бермекші болған. Бұл жөнінде инспектор тиісті органдарға хабарласып, нәтижесінде күдікті адам ұсталып, оған қатысты ҚР ҚК 367-бабының 1-бөлігімен (Пара беру) қылмыстық іс қозғалған болатын. Атырау қалалық №2 сотының қаулысымен, күдікті азамат жазасының қалған бөлігін қауіпсіздігі орташа мекемеде өтейтін болады", – деп хабарлайды Атырау облысы бойынша ҚАЖД баспасөз-қызметі.
Айта кететін жайт, бұған дейін де сыбайлас жемқорлықтың алдын алу мақсатында Атырау қалалық пробация қызметінің есебінде тұрған сотталған азаматша инспекторға пара бермек болғаны үшін жауапкершілікке тартылып, айыппұл төлеген болатын. Сыбайлас жемқорлықтың алдын-алуға арналған іс-шаралар жалғаса бермек.
