Париждің жұртшылығын дүр сілкіндірген жарылыстан зардап шеккендердің саны 29-ға дейін өсті, бірақ шұғыл көмекке мұқтаж адамдардың саны төртке дейін қысқарды. Тағы екі адам үйінділердің астында болуы мүмкін деп хабарланды, деп жазады inbusiness.kz Euronews-ке сілтеме жасап.
Оқиға Франция астанасының бесінші ауданында, Люксембург бағы мен Пантеонға жақын жерде, Сен-Жак, 277 мекенжайы бойынша орналасқан Америка академиясының ғимаратында болды.
Ғимарат ішінде газ жарылып, кейін нысанның қасбеті жолға құлаған көрінеді. Жақын маңдағы үйлердің тұрғындары эвакуацияланды.
Прокурорлар жарылыс себебінің екі нұсқасын - "қауіпсіздік ережелерін бұзу" және "жеке адамдардың абайсыздығын" қарастырып жатыр. Бұл туралы Париж прокуроры Лор Беко брифингте хабарлады.
Жарылыс болған жерге екі жүзден астам өрт сөндірушілер, құтқару қызметтері, сондай-ақ Париж мэрі Анн Идальго келді.
