Көші-қон полициясының өкілдері шетел азаматтарына Қазақстанда тұрақты тұруға рұқсат алу шарттарындағы жаңа талаптар туралы мәлімдеді, деп хабарлайды inbusiness.kz сайты.
2026 жылдың алғашқы бес айында Павлодар облысына ТМД елдерінен 2863 адам, ал алыс шетел мемлекеттерінен 557 адам келген. Олардың шамамен 2,3 мыңы өңірде еңбек қызметімен айналысса, 567 адам отбасымен қауышу мақсатында қоныс аударған. Сонымен қатар, өңірде шетелдіктердің болу тәртібін бұзу фактілері 789-дан 577-ге дейін азайған.
– Сонымен қатар, Қазақстанда шетел азаматтарының тұрақты тұруға рұқсат алуына қойылатын талаптар айтарлықтай күшейтілді, – дейді Павлодар облысы көші-қон полициясы басқармасы бастығының міндетін атқарушы Александр Кузьменко.
Ведомство өкілдерінің айтуынша, бұрын өтініш берушілер елге келіп, тұрғылықты елінен алынған анықтамамен бірге стандартты құжаттар пакетін тапсырып, төлем қабілеттілігін растаумен шектелетін. Енді бұл рәсім толықтай электрондық форматқа көшірілген.
Жаңа талаптарға сәйкес, үміткер отбасының әрбір мүшесіне шаққанда кемінде 85 мың теңге көлеміндегі табысын растауы тиіс. Сондай-ақ төлем қабілеттілігі ретінде белгіленген 1320 АЕК немесе шамамен 5,7 миллион теңге көлеміндегі қаражаттың бес жыл бойы тұрақты сақталуы қажет. Осы мерзім аяқталғаннан кейін шетел азаматы азаматтық алуға үміткер бола алады.
Іріктеу процесі толық цифрландырылып, өтініштер "Enbek migration" жүйесі арқылы қабылданады. Сонымен қатар, маңызды жаңашылдықтардың бірі ретінде мемлекеттік тілді білу бойынша міндетті тестілеу енгізілген. Үміткерге тілдік білімін растау үшін үш мүмкіндік беріледі.
Бұл өзгерістер көші-қон бақылауын автоматтандыруға және тұрақты резидент мәртебесін тек тұрақты табысы бар әрі Қазақстан қоғамына бейімделуге дайын азаматтардың алуына бағытталған.
Сонымен бірге кейбір санаттағы шетел азаматтары үшін жеңілдіктер қарастырылған. Олардың қатарында инвесторлар, сұранысқа ие мамандық иелері, Қазақстан экономикасына үлес қосып жүрген тұлғалар, әрекетке қабілетсіз адамдар, кәмелетке толмағандар (ата-анасының бірі Қазақстанда тұрақты тұрса), сондай-ақ бұрынғы отандастар және отбасымен қауышу мақсатында келген 60 жастан асқан азаматтар бар.
