Павлодар облысының аумағында коронавирус инфекциясын таратпау мақсатында эпидемияға қарсы қолданыстағы санитарлық, сақтық шараларын күшейту және қосымша шараларды қолға алу туралы шешім қабылданды, , деп хабарлайды pavlodarnews.kz.
Павлодар облысы бас санитарлық дәрігері орынбасарының бұйрығына сәйкес 2020 жылғы 1 сәуірдің 00:00 сағатынан бастап Павлодар облысында төмендегідей шаралар қолға алынады: ⠀
1) облыс аумағы бойынша 9 блокпост қойылады; ⠀
2) кез келген көлік құралымен шекаралас облыстарға/шекаралас облыстардан жолаушыларды тасымалдауға тыйым салынады; ⠀
3) облыс ішіндегі елдімекендер арасында кез келген көлік түрімен жолаушыларды тасымалдауға тыйым салынады; ⠀
4) дипломатиялық қызметтерді, емделуге баратын адамдарды, азық-түлік және азық-түлікке жатпайтын тауарлар тиелген транзиттік жүк көліктерді (эпидемияға қарсы дезинфекциялауды және сақтық шараларын қатаң қадағалай отырып) қоспағанда, Қазақстан Республикасының басқа өңірлерінің тұрғындары мен басқа мемлекеттердің азаматтарының кіруіне тыйым салынады; ⠀
5) 22:00-ден кейін тұрғындардың пәтерден, үйден шығуы шектеледі. Тек қана тұрып жатқан жеріне жақын дәріханалар мен азық-түлік дүкендеріне, жұмысқа және медициналық көмекке баруға ғана рұқсат беріледі; ⠀
6) тұрғындардың қоғамдық орындарға, оның ішінде жағалауларға, саябақтарға, алаңдарға, ойын және спорт алаңдарына, сондай-ақ тағы да басқа жерлерге баруы шектеледі; ⠀
7) эпидемияға қарсы режимге байланысты қоғамдық көліктерде, адамдар көп жиналатын орындарда, дүкендерде, сауда орталықтары мен үйлерде, тұрғын үйлерде, аялдамаларда және тағы да басқа жерлерде дезинфекциялау жұмыстары күшейтіледі.
