Павлодар облысының сайлаушылары республикалық референдумда жоғары белсенділік көрсетуде, деп хабарлайды inbusiness.kz тілшісі.
Орталық референдум комиссиясының хабарлауынша, сағат 12.00-дегі жағдай бойынша өңірдегі сайлаушылардың 51,17%-ы Ата Заңға енгізілетін өзгерістер мен толықтыруларға қатысты өз пікірін білдірді. Бұл – белсенділік бойынша үшінші көрсеткіш.
Ауа райының күрт суып, таңертең жаңбыр болғанына қарамастан учаскелерге келген тұрғындар қарасы қалың. Жастар да, қарттар да келіп жатыр. Олардың қатарында Ақтоғай ауданы Жаңабет ауылындағы №155 учаскедегі дауыс берген 85 жасар Оралша Сманова бар. Ол бүгін бірінші рет дауыс беріп жатқан немересі Арман Оркеновпен бірге келді.
"Мен үшін сайлау – мереке. Осы күнге дейін бірде бір сайлаудан қалып көрген емеспін. Ерте тұрып, учаскеге келу – бұрыннан қалыптасқан әдет. Бүгін немерем Арман бірінші рет дауыс беріп отыр. Сондықтан биылғы референдумның орны ерекше", – дейді кейуана.
Референдум комиссиялары бірінші рет дауыс беріп жатқан жастарға, алғаш келген сайлаушыларға, қарт дауыс берушілерге естелік сыйлықтарды үлестірді.
Сондай-ақ бүгін қоғамдық көліктің барлық түрінде жүру тегін. Облыс орталығы мен аудан-қалаларда ауыл шаруашылығы жәрмеңкелері ұйымдастырылып, өнім арзан бағаға сатылуда.
Құндыз Қабылденова
Фото: Есенжол Исабек
