Павлодар облысы ТЖД баспасөз қызметі хабарлағандай, дала өрті туралы хабарлама 22 қазанда сағат 11:52-де түскен.
"Өрт Ертіс жайылмасындағы Жаңатілек ауылының маңында тұтанған. Шашыраңқы бес жерде құрғақ шөп пен қамыс өртеніп жатыр. Өрттің жалпы ауданы 140 гектарды құрады. Сондай-ақ шамамен 70 тонна жаңа шабылған шөп өртенді", – деп хабарлады ведомствоның баспасөз қызметі.
Өрт орнында 80 адам жұмыс істейді, оның ішінде өз еркімен көмектесіп жүрген 50 жергілікті тұрғын бар. Ведомство өрт жалыны жақын маңдағы елдімекендерге қауіп төндірмейтінін жеткізді.
Сонымен қатар өртті сөндіруге ауа-райының қолайсыздығын қиындық келтірген. 23 қазанда Павлодар облысында желдің күшеюіне байланысты екпіні секундына 23-28 метрге жететін дауылды ескерту жарияланған болатын.
