Биыл Ақсу қаласындағы Ақсу ферроқорытпа зауыты белгіленген нормадан тыс шығарындылары үшін 855 млн теңге айыппұл төлеген, деп жазады inbusiness.kz сайты.
Кәсіпкерлік субъектілері жіберетін негізгі әрі елеулі құқықбұзушылықтардың бірі – эмиссиялардың белгіленген лимиттерден асып кетуі.
"Соңғы 2 жылда Павлодар облысында өнеркәсіптік қалдықтарды көмуге қатысты экологиялық заңнаманы бұзудың бірнеше жағдайы тіркелді. Мұндай құқықбұзушылықтар жиі кездеспейді. Дейтұрғанмен аталған қызмет түрімен айналысатын бизнес субъектілерінің мәселесі қоғамда кеңінен талқыланып келеді", – деп хабарлады өңірлік мамандандырылған табиғат қорғау прокуратурасының баспасөз қызметі.
Табиғат қорғау прокурорлары саладағы тиісті заңнаманы бұзудың ең кең таралған түрлері – аң аулау және балық аулау қағидаларын бұзу екенін айтады.
Мысалы, биыл 1015 құқықбұзушылықтың 612 жағдайы аңшылық пен балық аулауға қатысты тіркелген.
