Павлодар облысы Полиция департаментінің кинологиялық қызмет орталығы қылмыспен күресте маңызды рөл атқарып, құқық бұзушылықтарды анықтау мен ашуға елеулі үлес қосып келеді, деп хабарлайды inbusiness.kz сайты.
Қызметтік иттер бүгінгі күні қару-жарақ пен есірткі заттарын анықтауда ең тиімді құралдардың бірі саналады. Сонымен қатар олар ауыр және аса ауыр қылмыстарды ашу барысында да таптырмас көмекші болып отыр. Қазіргі таңда орталықта 28 қызметтік-іздестіру иті бар.
2025 жылы төрт аяқты полицейлер мыңнан астам шақыртуға қатысып, 210 қылмыстың ашылуына өз үлесін қосты. Олардың көмегімен өткен жылы заңсыз айналымға түсуі мүмкін болған 130 келіден астам есірткі затының жолы кесілді.
Төрт аяқты полицейлердің жетістігінің артында кинолог мамандарының күнделікті қажырлы еңбегі тұр. Иттерді үйрету үздіксіз жүргізіледі және бірнеше кезеңнен тұрады. Жаттығу барысында иттер қажетті дағдыларды меңгеріп, иесінің әрбір қимылына жедел жауап беруге үйренеді. Әр қызметтік иттің өз мамандануы бар және олар өз бағыттары бойынша кәсіби деңгейде дайындалған.
– Әрбір полиция кинологының басты міндеті – қызметтік итті оқиға орнында немесе жедел-іздестіру іс-шаралары кезінде қолдануға әрдайым дайын болу. Біздің салада кездейсоқ адамдар болмайды. Бұл қызметтің негізінде жануарларға деген махаббат жатыр. Еңбексүйгіштік, төзімділік, бастамашылдық, жауапкершілік пен зейін болмаса, адам мен иттің тиімді тандемі қалыптаспайды, – дейді Павлодар облысы ПД кинологиялық қызмет орталығының басшысы Нияз Валиев.
Кинологиялық оқу орталығында қызметтік иттер ветеринар мамандардың тұрақты бақылауында болады. Қызметке қабылдар алдында иттер арнайы талаптар бойынша мұқият іріктеледі. Кинологтар күн сайын жаттығу өткізіп, жалпы үйрету курсынан бөлек, іздестіру жұмысына аса қажет дағдыларды қалыптастырады.
Қазіргі уақытта қызметтік иттерді қылмыстарды анықтау мен ашуда тиімді қолдануды арттыру бағытындағы жұмыстар жалғасуда. Бұл – өңірдегі қоғамдық қауіпсіздікті қамтамасыз етудің маңызды тетіктерінің бірі.
