Бұл туралы Өңірлік коммуникациялар қызметінде өткен баспасөз жиынында Павлодар облыстық орман шаруашылығы және жануарлар дүниесі аумақтық инспекциясының басшысы Руслан Тулепбаев мәлім етті.
– Биыл өртті ерте анықтау үшін Шарбақты ауданындағы "Ертіс орманы" орман резерватының аумағында смарт-камера деп аталатын оптикалық сенсорлық және тепловизор қондырғыларын енгізу жоспарланған. 30 метр биіктікте орналастырылатын бұл камералар 360 градусқа дейін айнала алады және тәулік бойы жұмыс істейді, – деді Руслан Тулепбаев.
Оның сөзінше, мұндай камералар тұтану көздерін автоматты түрде анықтауға, олардың пайда болу орындарын анықтауға, қажетті техника мен күшті жеткізуде ыңғайлы маршруттарды құруға мүмкіндік береді.
– Республикалық бюджеттен орман өртін ерте анықтау жүйесін орнатуға – 2,4 млрд теңге, Баянауыл ұлттық табиғи паркінің қорықтарын материалдық-техникалық жарақтандыруға 1,5 млрд бөлінген, – дейді спикер.
Айта кетейік, сонымен қатар облыс әкімдігінің қарамағындағы үш орман мекемесін материалдық-техникалық жарақтандыруға облыстық бюджеттен шамамен 330 млн теңге бөлінген. Бұл – Павлодар, Үрлітүп, Максим Горький атындағы орман және жануарлар әлемін қорғау жөніндегі мемлекеттік мекемелері.
