Павлодар С. Торайғыров атындағы облыстық кітапханасында "Ақбеттау" журналының тұсаукесері өтті, деп хабарлайды pavlodarnews.kz.
"Ақбеттау" - қасиетті Ертіс-Баян өңірінің тау тұлғалары өшпес із қалдырған киелі өлкенің тарихымен таныстыратын тарихи-танымдық, әдеби-көркем журнал. Елбасының "Болашаққа бағдар: Рухани жаңғыру" бағдарламалық мақаласының "Туған жер" бағдарламасы аясында жарық көрген журналдың бірінші саны ғұлама Мәшһүр Жүсіп Көпейұлына арналған. Редакторы – журналист, ақын, жазушы, ҚР еңбек сіңірген мәдениет қызметкері, Қазақстан Жазушылар одағының мүшесі Сайлау Байбосын.
Шараға журналдың ақылдастар алқасының мүшелері, облыстық мәдениет басқармасының басшысы Ардақ Райымбеков, Қазақстан жазушылар одағы Павлодар облыстық филиалының төрағасы белгілі ақын Арман Қани, "Қазақ тілі" қоғамы Павлодар облыстық филиалының басшысы Социал Әйтенов және тағы басқа зиялы қауым, студенттер мен оқырмандар қатысады. "Дархан даланың данышпан ұлы" атты көрме ұлы ойшыл, ғұлама Мәшһүр Жүсіп Көпейұлының өмірі және шығармашылығымен таныстырады.
