Өңірде су басуға қатысты жағдай күрделене түсті. Еріген қар суы жолдардан асып, үйлердің аулаларына жайылды. Кейбір тұрғындарға баспанасынан шығу мұң боп қалды, деп хабарлайды inbusiness.kz тілшісі.
Қазіргі уақытта алты үйді су басқаны анықталды. Олар - Ақтоғай ауданының Жалаулы ауылында, Успен ауданының Успен, Вознесенка, Белоусовка ауылдарында, Павлодар ауданының Розовка ауылында және Аққулы ауданының Қазы ауылында орналасқан баспаналар.
Әсіресе, Розовка ауылындағы жағдай күрделі. Бұған дейін ауылға кірген судың біраз бөлігі сорып алынғанымен, қырдан еріген қар суы әлі де келіп жатыр.
Бүгін кешке басталатын жаңбыр жағдайды одан әрі қиындата түсуі мүмкін. Елді мекендегі жағдайды шолып шыққан Павлодар облысының әкімі Асайын Байханов жергілікті биліктің жұмысын сынға алып, сылдау іздемей, жағдайдың салдарымен күресу керек екенін қадап айтты. Жедел штаб барысында техникалар мен мамандар санын көбейтуді тапсырды.
Жалпы, 29 наурыздағы жағдай бойынша, Ақсу қаласында, Павлодар, Ақтоғай, Ертіс, Май, Успен, Железин, Аққулы аудандарында су тасқынына қарсы 10 учаске бақылауда тұр. Онда 12 үйдің ауласына су кірген. Енді баспаналардың өзін су басу қаупі бар. Оны болдырмас үшін суды сорып шығару, инертті материал төсеу және т. б. жұмыстар жүргізілуде.
Облыс бойынша су тасқынына қарсы іс-шараларды өткізу үшін 243 адам, 78 арнайы техника, 22 мотопомпа, 2 жүзу құралдары жұмылдырылды. Барлығы 34 477 текше метр еріген қар суы сорып шығарылды, 880 қап инертті материал төселіп, 320 тонна инертті материал төгілді.
Енді облыс басшылығы төтенше жағдайлар департаментіне бірге іс-қимыл жоспарын әзірлеп, қардың еру ауқымы мен су басу қаупі бар аймақтарды белгілеу үшін ертең ауылдардың жағдайын тікұшақтан да бақыламақ.
