Павлодарда полиция пунктінің маңында соққыға жығылған 14 жастағы оқушы ауруханаға жеткізілді, деп хабарлайды Inbusiness.kz.
Pavlodarnews.kz хабарлауынша, 103 қызметіне қоңырау 24 шілде күні кешке түскен.
"Ол жабық ми жарақатын алған, денесінің біраз жері көгерген, екі қабырғасы ішінен сынған. Жалпы жағдайы орташа деп бағаланады", — деді Денсаулық сақтау басқармасының баспасөз қызметі.
Полиция департаментінің хабарлауынша, төбелеске қатысушылардың барлығы анықталды. Істі ҚР ҚК 107-бабының 2-бөлігінің 4-тармағы "алдын ала сөз байласу бойынша топтың денсаулыққа қасақана ауырлығы орташа зиян келтіруі" бойынша тексереді.
Қатысушыларға 2 мың АЕК-ке — 6,9 млн теңгеге дейін айыппұл, 800 сағатқа дейін түзеу немесе қоғамдық жұмыстар, 3 жылға дейін шектеу немесе бас бостандығынан айыру қаупі төніп тұр.
