Павлодар облысында полиция балаларына алимент төлемеген ананы тапты, деп хабарлайды inbusiness.kz сайты Polisia.kz-ке сілтеме жасап.
Облыстық ПД Көші-қон қызметінің басшысы Дәулет Ысқақовтың айтуынша, жыл басынан бері өңірде алимент төлеуден жалтарған 91 адам анықталған.
"Борышкерлердің 7 көлігі айыппұл тұрағына қойылды. Мысалы, ажырасқаннан кейін әке қызын тәрбиелеуге қатыспаған. 35 жастағы борышкердің қарызы 3,5 миллион теңгеге жеткен. Оны полицейлер Қарағанды облысының ауылдарының бірінен тапты", - деді Дәулет Ысқақов
Полиция дерегінше, алимент төлеуден әкелер ғана емес, аналар да жалтарады. Мысалы, 42 жастағы әйел кәмелетке толмаған 3 балаға алимент төлемеген. Осылайша, қарыз 7 миллион теңгеден асқан.
Қазіргі уақытта әйелмен полицейлер жұмыс жүргізіп жатыр.
Полиция алиментті уақытында төлемеген қазақстандықтар Қылмыстық кодекстің 139-бабына сәйкес жауапқа тартылатынын ескертеді.
