Сейсенбіден сәрсенбіге қараған түні облыс орталығындағы екі қабатты баспанадағы пәтерлер қызыл жалынға оранды. Салдарынан бір адам қайтыс болды, деп хабарлайды inbusiness.kz тілшісі.
Павлодар қаласы төтенше жағдайлар департаменті бастығының орынбасары Тілекжан Галямовтың айтуынша, "101" пультіне Набережная көшесі, 5 мекенжайындағы көпқабатты тұрғын үйден өрт шығып жатқаны туралы хабар түскен. Қызыл жалын 6 шаршы метр аумақты шарпып, жиһаздар мен үйдегі заттар отқа орнады. Өрт орнынан 1960 жылы туған ер адамның денесі табылды.
"Қазіргі уақытта өрт себептері анықталуда. Оны сөндіруге 28 адам мен 8 техника жұмылдырылды", - дейді Тілекжан Галямов.
Сонымен қатар, облыс орталығындағы Мәшһүр Жүсіп көшесі, 280 мекенжайындағы тағы бір пәтер отқа оранды. Өрт сөндірушілер 10 адамды құтқарып, 25 адамды эвакуациялады. Пәтердің 1996 жылы туған иесі дене күйігін алып, ауруханаға жеткізілді. Өрт жарты сағат ішінде сөндірілді.
