Павлодарда шайбалы хоккейден 2009 жылғы балғындар арасында өткен ҚР чемпионатының 4-туры өз мәресіне жетті, деп хабарлайды 24.kz.
Үш күн бойы "Астана-2", "Ертіс", "Барыс-2", "Торпедо", "Арлан" және "Юность" хоккей командалары "Астана" мұз сарайында тартысты бәсекелер өткізді. Жарыстың қорытынды кезеңінде Қарағанды хоккей клубының "Юность" және елордалық "Астана-2" және "Барыс-2" командалары суырылып алға шықты.
"Барыстықтар" қарсыластарын 1-4 есебімен ұтты. Қалған екі команда екінші және үшінші орынды місе тұтты.
Ойын нәтижесі бойынша күміс жүлдені Қарағандының "Юность" командасы еншіледі. Үшінші орын "Астана-2" хоккей командасына бұйырды.
"Үздік қақпашы" жүлдесімен "Барыс" командасының ойыншысы Расул Мұхамедқали марапатталды. Төрешілер осы команданың ойыншысы Жандос Нұртеловті "Үздік шабуылшы" деп таныды. Ал "Юность" командасынан Вадим Фирсе "Үздік қорғаушы" атанды.
