Алматыда өткен қысқы Универсиада ойындарының бес мәрте жүлдегері атанған шаңғышы Анна Шевченкоға облыс әкімінің жас спортшылармен кездесуі кезінде екі бөлмелі пәтердің сертификаты табысталды, деп хабарлайды pavlodarnews.kz.
"Біз сіздің әрбір жарысыңызды қарап, жанкүйер болдық. Қазақстан құрамасынының қоржынына бес бірдей медаль сыйлап, бәрімізді қуанышқа бөлегеніңізге рахмет. Тығыз дайындық жұмыстарына қарамастан, уақыт бөліп келгеніңіз үшін де алғыс білдіремін", – деді Болат Бақауов.
Анна Шевченко пәтер алу өзінің арманы екенін айтты.
"Бүгін тағы бір арманым орындалды. Маған қолдау танытқаныңыз үшін рахмет. Алғашқы жүлдемді алған соң маған облыс әкімі хабарласып жатыр деп тұтқаны берген кезде қалжың деп ойлаған едім. Дегенмен көңіл сүйсіндірерлік іс болды", – деді шаңғышы.
Айта кетейік, XXVIII қысқы Универсиада ойындарында Павлодар облысынан 10 спортшы өңір намысын қорғап, 11 жүлде ұтып алды. Анна Шевченко үш қола, бір күміс және бір алтын медаль еншілеп, бір Универсиадада бес рет тұғырға көтерілген тұңғыш қазақстандық спортшы атанды.
