Павлодар қаласындағы "Жас дарын" мектебінде еліміз бойынша бірінші болып адамның түрін анықтайтын құрылғы орнатылмақ, деп хабарлайды pavlodarnews.kz .
Құрылғы оқушылардың түрін анықтап мектепке кіргізеді де, ата-анасына баласы оқуға келгендігі жөнінде хабарлама жіберетін болады. Мектеп аумағынан шыққан кезде де дәл солай хабарланбақ. Бұл өз кезегінде ата-аналардың баласының қауіпсіз жерде екенін біліп, алаңсыз отыруына мүмкіндік береді. Оған қоса, мектептегі оқушылардың сабаққа қатысу деңгейіне есеп жүргізуге болады. Сыныпта аты-жөнін атап түгендеудің қажеттілігі тумайды.
"ТЕХНОЭКСПО" компаниясының өкілі Бауыржан Мұқаевтың айтуынша, бұл әлем бойынша алдыңғы қатардағы жүйе. Анықтау деңгейі 96-98 пайыз. Елімізде өзге де ұйымдықтарда сынақтан өткен. Алайда, білім ордалары бойынша тұңғыш рет осы мектепте тексеруден өткізілуде. Ұсыныстар болса өзге де мекемелерде құруға дайын. Сынақ мерзімі екі аптадан - бір айға дейін жалғасады.
Аталмыш бағдарламаны Дубай, Гонконг, Шри-Ланкада қолданады. Дубай қаласы толықтай осы жүйемен жасақталған.
