/img/tv1.svg
RU KZ
Павлодарлық журналист өзі оқыған 100-ге жуық кітапты кітапханаға сыйға тартты

Павлодарлық журналист өзі оқыған 100-ге жуық кітапты кітапханаға сыйға тартты

Акцияға белсене қатысқандардың бірі - белгілі журналист, Сейтахмет Бердіқұлов атындағы сыйлықтың иегері Фархат Әміренов. 

15 Ақпан 2020 18:01 641

Павлодарлық журналист өзі оқыған 100-ге жуық кітапты кітапханаға сыйға тартты

С.Торайғыров атындағы Павлодар облыстық кітапханасында 14 ақпан - Халықаралық кітап сыйлау күніне орай «Кітапханаға кітап сыйла» акциясы ұйымдастырылды, деп хабарлайды pavlodarnews.kz.

Акцияның тұсаукесер рәсіміне қатысқан ПГУ профессоры, ғалым Василий Убаськин бұл күннің маңыздылығына тоқталып өтті. Сондай-ақ өзінің жеке кітап қорынан кітапханаға таңдаулы туындыларды сыйға тартты. Акцияға белсене қатысқандардың бірі - белгілі журналист, Сейтахмет Бердіқұлов атындағы сыйлықтың иегері Фархат Әміренов. Ол акция аясында кітапханамызға 100-ге жуық өзі оқыған кітабын сыйға берді.

«Мен кітапты іздеп жүріп, сатып алып оқимын. Жұмыс бабымен Алматы, Нұр-Сұлтан секілді үлкен қалаларға барсам, бірден кітап дүкеніне соғамын. Осылайша үйдегі жеке кітапханама 500-ден астам кітап жиналып қалған екен. Соның бір бөлігін руханиятымыздың қарашаңырағы - облыстық кітапханаға сеніп тапсыруды жөн көрдім. Осындай шара ұйымдастырған кітапхана ұжымына оқырмандар атынан зор алғыс айтамын»,-деді Фархат Қайратұлы.

Сондай-ақ облыстық кітапхананың балалар әдебиеті бөлімінің меңгерушісі Марина Золотухина көпшілікті акцияның ашылуымен құттықтап, кітап қорын жаңа туындылармен толықтырды.

Айта кетейік, «Кітапханаға кітап сыйла!» акциясы осы жылдың 14-наурызына дейін жалғасады. 

Биыл Шымкенттен Павлодарға 54 отбасын көшіру жоспарланған

Былтыр қаладан 81 отбасы Солтүстік Қазақстан, Қостанай, Павлодар, Шығыс Қазақстан облыстарына қоныс аударған.

24 Ақпан 2019 00:24 932

Шымкенттегі әл Фараби ауданы әкімдігінде жергілікті халықпен кездескен павлодарлық делегация солтүстікке қоныс аударуға қатысты мемлекеттік бағдарламаны түсіндірді, деп хабарлайды otyrar.kz.

40 шақты бос жұмыс орнын ұсынып отырған павлодарлықтар 100-ден аса отбасын баспанамен қамтуға әзірміз дейді. Сондай-ақ қоныс аударатын отбасыға бір реттік жәрдемақы мен баспананы жалға алу ақысымен қоса коммуналдық төлемдері де төленеді.

Айта кетейік, былтыр Шымкент қаласы жұмыспен қамту орталығының мамандары өтініш білдірген 81 отбасын Солтүстік Қазақстан, Қостанай, Павлодар, Шығыс Қазақстан облыстарына қоныс аударуға ықпал еткен. Жұмысқа қабілетті 300-ге жуық адам екі қолға бір күрек тапты дейді жауаптылар. Олар мұғалім, дәрігер, агроном сияқты түрлі мамандықтар бойынша жұмысқа орналасып, кейбірі жеке кәсіптерін ашқан.

Саладағылардың айтуына қарағанда, жері құнарлы, сулы да нулы солтүстік жерінде ауыл шаруашылығын түлетуге мүмкіндік мол. Биыл жыл аяғына дейін 200-ден аса мүшесі бар 54 отбасын қоныс аударту жоспары тұр.

Заңсыз жиналған 47 тонна медициналық қалдыққа байланысты қылмыстық іс қозғалды

Ашық жатқан препараттарды экологтар жоспардан тыс тексеріс кезінде анықтаған. 

25 Қаңтар 2019 12:02 814

Павлодарда 47 тонна медициналық қалдық табылды. Экология департаменті олардың заңсыз лақтырылғанын, ал ол тұрғындар үшін өте қауіпті екенін айтты, деп хабарлайды astanatv.kz.

Ашық жатқан препараттарды экологтар жоспардан тыс тексеріс кезінде анықтаған. Олар қалдықтарды өртеу тиісті құжатсыз жүргізіліп келген деп отыр. «Утилизация» ЖШС 5 ауруханадан шыққан медициналық қалдықтарды жинап, жоймақ болған.   

«Аталған медициналық қалдықтар өте зиянды. Экологиялық жіктелімге сәйкес қауіпті деңгей. Яғни, адам өмірі мен қоршаған ортаға тигізетін кері әсері көп. Санитарлық санаты бойынша «Б» және «В» класына кіретін инфекцияланған медициналық қалдықтар»,– дейді Павлодар облыстық экология департаментінің бас мемлекеттік инспекторы Дархан Ісжанов.

Аталған фирма әкімшілік жауапкершілікке тартылды. Оған 144 мың теңге көлемінде айыппұл салынды. Мамандар оған қоса қоршаған ортаға келтірген зияны үшін 1 млн 700 мың теңге көлеміндегі шығынды өтеуі қажет деп отыр. Бұл іске табиғатты қорғау прокуратурасы да араласты. Қылмыстық іс қозғалып, тергеу басталған.