Білім және ғылым министрі Асхат Аймағаметовтің айтуынша, мұғалімдерді олардың міндетіне жатпайтын жұмысқа салу фактілері әлі де кездесіп отыр.
"Мемлекет басшысы Қасым-Жомарт Тоқаев министрлікке "Педагог мәртебесі туралы" Заң нормаларын іске асыру бойынша атқарылып жатқан жұмысты жалғастыруды тапсырды. Аталған құжаттың маңызды ережелерінің бірі – педагогті міндетіне жатпайтын функцияларға тартудан қорғау, орынсыз есептіліктен босату. Бұл нормалар жаңа оқу жылы қарсаңында өте өзекті. Министрліктің осыған қатысты қатаң ұстанымдарына қарамастан, өкінішке қарай, осы ережелерді бұзу фактілері әлі де кездеседі",– дейді министр Фейсбуктегі жазбасында.
Асхат Аймағамбетов орын алған осындай жағдайдың бір-екеуін мысалға алды. Оның бірі осыдан бірнеше апта бұрын Ленгір мектеп-интернатындағы жағдай болса, екіншісі Кентаудағы мектепте болған оқиға. Мектеп-интернатта педагогтерді лауазымдық міндеттеріне кірмейтін жұмыстарға тартқан.
"Білім саласында сапаны қамтамасыз ету департаменті оқиға орнына барып, қызметтік тексеру жүргізді. Фактілер расталды және мектеп директорының м.а. әкімшілік жауапкершілікке тартылды",– дейді Аймағамбетов.
Түркістан облысы Кентау қаласындағы Молда Мұса атындағы мектепте де қызметтік тексеру жүргізілген. Онда мұғалімді мектепті жөндеу жұмыстарына тартқан.
"Аталған факті тексеру барысында расталды. Мектеп директорының міндетін атқарушы да, Кентау қалалық білім бөлімінің қызметкері де әкімшілік жауапкершілікке тартылды",– дейді жазбасында ведомство басшысы.
Оның айтуынша қысқа уақыттың өзінде Білім саласында сапаны қамтамасыз ету жөніндегі аумақтық департаменттерге жүзден астам өтініш келіп түскен. Нәтижесінде лауазымды тұлғаларға да, білім алушылардың ата-аналарына да қатысты 30-дан астам әкімшілік жаза қолданылыпты.
"Бұл жұмыс тұрақты түрде жүргізілетін болады. Заңсыздыққа жол берген жауапты тұлғаларға қатысты шаралар мұнымен шектелмейді. Әкімшілік жазалардан бөлек, жұмыстан босату туралы шешімдер де қабылданады. Мұғалімдердің құқығын қорғау – жергілікті аумақтық орган басшыларының да, мектеп директорларының да тікелей міндеті",– деп ескертеді министр.
Сондай-ақ ол мұғалімдер де өз міндетіне адал болу керектігін, педагогикалық қызметпен айналысатын әрбір жан жас ұрпаққа үлгі болып, өз жұмысында адамгершілік қағидалары мен моральдық құндылықтарды басшылыққа алуға тиіс екенін айта кетті.
"Мінез-құлық мәдениеті, әдептілік, адалдық, адамның ар-намысы мен қадір-қасиетін құрметтеу – педагогикалық этиканың негізі. Осы қағидалардың сақталуын бақылау үшін біз мұғалімдерге қатысты құқықбұзушылықтар мен педагогикалық этиканы өрескел бұзу туралы даулы мәселелерді қарастыратын арнайы алқалы орган құруды қарастырудамыз. Бұл – педагогикалық этика және мұғалімдердің құқықтарын қорғау жөніндегі кеңес. Мұндай институт алғаш рет пилоттық режимде осы жылдың тамыз айынан бастап Нұр-Сұлтан қаласында жұмыс істеуді бастады. Болашақта этика бойынша Кеңестер еліміздің барлық аймағында құрыла алады. Олар білім беру саласында сапаны қамтамасыз ету департаменттері жанында жұмыс істейтін болады. Барлығымыз мемлекеттік қызметкерлердің Әдеп жөніндегі кеңесінің тиімді жұмысының куәсі болдық. Біздің жаңадан құрылған Кеңестеріміздің қызметі соның үлгісі бойынша ұйымдастырылады. Мұның бәрі – үлкен бастама: әр мұғалім өзінің мәртебесін мақтан тұтуы керек. Ыңғайлы жағдайда жұмыс істеп, сапалы білім беруі керек. Өйткені біздің балаларымыздың әл-ауқаты мен білімі ұстаздардың қолында. "Алты Алаштың игі жақсысы бас қосса, төрдегі орын - ұстаздікі" - дегендей осы тарапта алдымызда әлі де біраз жұмыс бар екені белгілі",– деп аяқтадйды жазбасын Асхат Аймағамбетов.
