Газаға гуманитарлық көмек жеткізу үшін пайдаланылған АҚШ салған уақытша пирс теңіз дауылы мен ауа-райының қолайсыздығынан кейін қайта жөнделеді, деп хабарлайды inbusiness.kz сайты Пентагон хабарламасына сілтеме жасап.
АҚШ Қорғаныс министрлігінің баспасөз хатшысы Сабрина Сингхтің айтуынша, келесі екі күнде пирс бөлшектеліп, Израильдің оңтүстік қаласына Ашдодқа жеткізіледі, онда АҚШ-тың Орталық қолбасшылығы оны жөндейді.
Оның айтуынша, жөндеу жұмыстары "бір аптадан астам уақытты алады".
"Бір аптадан кейін біз қайта жұмысқа кірісеміз деп үміттенемін", - деді ол.
Газаға гуманитарлық көмек жеткізу үшін америкалық әскерилер салған уақытша айлақ сейсенбіде теңіздегі қатты толқындар салдарынан қирады.
Құрылысы 320 миллион долларды тұратын айлақ 17 мамырда жұмыс істей бастады, бірақ теңіз тасымалы бір аптадан кейін тоқтатылды.
Бұған дейін АҚШ Орталық қолбасшылығы қолбасшысының орынбасары, вице-адмирал Брэд Купер 820 тонна гуманитарлық көмек пирс арқылы газа жағажайына жеткізілгенін мәлімдеді.
