Петропавл тұрғыны емханаға жарылғыш зат әкеліп, медициналық қызметкерлерге сес көрсетті, деп хабарлайды ҚазАқпарат.
Солтүстік Қазақстан облысы Полиция департаменті баспасөз қызметінің мәліметінше, оқыс оқиға бүгін таңертең болды. 58 жастағы петропавлдық 4-қалалық ауруханаға келіп, гранатамен медициналық қызметкерлерді қорқытқан. Бірден полицияға хабар беріліп, емдеу мекемесіне барлық тиісті қызметтер жұмылдырылды.
"102 нөміріне хабар сағат 9.10 минут кеткенде түсті. Оқиға орнына барлық мамандар жөнелтілді. № 4 қалалық емхана ғимаратынан барлық медициналық қызметкерлер мен дәрігердің қабылдауына келген 100-ден астам адам қауіпсіз жерге шығарылды", – дейді СҚО ПД бастығының орынбасары Еңбек Сембин.
Гранатаны жарғыш техниктер арнайы контейнерге орналастырды.
Мамандардың айтуынша, Ф-1 гранатасында тұтандырғышы болмаған, яғни жарылуы мүмкін емес. Ер адам ұсталып, істің мән-жайын анықтау үшін Петропавл қалалық полиция басқармасының Бірінші полиция бөліміне жеткізілді.
Бұл факті ҚР Қылмыстық кодексінің 287-бабы 3-бөлігі бойынша сотқа дейінгі тергеп-тексерудің бірыңғай тізіліміне енгізілді, оның аясында сараптама тағайындалады. Ұсталған адамның айтуынша, оның мұндай қадамға баруына медициналық мекеменің сапасыз қызметі итермелеген.
Ер адам Ауған соғысына қатысушы, паралимпиадалық ойындарға қатысқан.
