Оқиға 5 маусымда болған. Суицид жасауға талпынған азаматтың 39 жаста екені анықталды.
Балконның сыртындағы арқанға ілініп тұрған ер адамды көрген куәгерлер бірден құтқару қызметіне хабарласқан. Полиция қызметкерлері мен құтқарушылар оқиға орнына жылдам жетіпті.
Қарағанды қаласы Оңтүстік-Шығыс полиция бөлімі криминалдық полиция бөлімшесі бастығының орынбасары Әділет Әмірбеков ер адамды әңгімеге тартып, оны райынан қайтаруға тырысқан.
"Құтқарушылар есікті ашуға әрекеттеніп жатқанда, мен балкон сыртында тұрған ер адаммен сөйлесуге тырыстым. Уақыт санаулы еді. Әріптестерім төменгі қабатта сақтық шараларын бақылап тұрды. Ақыры бір сәтте оны ішке қарай тартып үлгердік", — дейді ол.
Полицейлердің кәсіби шеберлігі осылайша қайғылы жағдайдың алдын алды. Қазір құтқарылған азамат медициналық бақылауда. Дәрігерлер мен психологтар оның мұндай әрекетке не үшін барғанын анықтап, тиісті көмек көрсетуде.
