"Көлік жүргізу куәлігін беру және емтихан қабылдау функциясы "Азаматтарға арналған үкімет" мемлекеттік корпорациясына берілді. Тіркеу-емтихан орталықтары жойылды. Қазір полиция көлік құралдарының криминалдық тарихын ғана тексереді", – деді министр.
Ерлан Тұрғымбаевтің айтуынша, жемқорлықты жою үшін азаматтармен тікелей байланыс азайды.
"Елімізде 30 тәулікке дейін болатын шетел азаматтарын тіркеу тоқтатылды. Электронды виза енгізілді. Көші-қон саласындағы кейбір функция Еңбек және әлеуметтік қорғау министрлігіне берілді. Қала сыртындағы "Рубеж" стационарлық бекеттерінің саны 36-дан 6-ға дейін қысқарды. Стационарлық бекеттер шекаралас аудандарда ғана қалды", – деді министр.
Ерлан Тұрғымбаевтің сөзінше, соңғы 3 жылда саладағы сыбайлас жемқорлық қылмысының саны 43%-ға қысқарды.
"Жемқорлыққа қарсы белсенді күрес барысында 146 басшы жазаға тартылды. Оның 42-сі қызметтен босатылды, 7-еуі жұмыстан шығарылды", – деді министр.
Қанат Махамбет
