Аты жөнін жасырып қалуды жөн көрген АҚШ-тың үш лауазымды тұлғасы Польша жеріне құлаған зымырандарды Ресей зымырандарын атып түсіру мақсатында Украина әскери күштері жіберген болуы мүмкін екенін мәлімдеді деп жазады Associated Press агенттігі. Өйткені Ресей сейсенбі күні Украинаның электр инфрақұрылымдарына жаппай соққы жасаған болатын.
Дегенмен, АҚШ Президенті Джо Байден де, Польша Президенті Анджей Дуда тексеру нәтижелері шықпай жатып, зымырандардың қай елге тиесілі екенін дөп басып айту мүмкін емес екенін мәлімдеген болатын. Бүгін Польшаның бастамасымен НАТО штаб-пәтерінде Альянстың шұғыл отырысы өтеді.
Сейсенбі күні Польшаның Украинамен шекаралас аумағына екі зымыран құлап, екі адам опат болған еді. Украина бұл оқиғаға Ресейді кінәлаған болатын. Ресей тарапы айыптауларды жоққа шығарған еді.
